انا صالح عاشق للعالم الآخر وما يخصه اقرا قصصهم ومعلومات عنهم وعالمهم اعيشه اكثر من عالمي صارت السالفه (هوس) كنت اروح اماكن مهجورة كثير واماكن يقولون انها مسكونة بس ماقد شفت شيء المهم جا يوم وجاني واحد من اخوياي وقالي عن قرية مهجورة ومسكونة طبعاً قلت بروح مثل اي مكان ثاني رحته لكن خويي قال : لا ما انصحك تروحها وما قلت لك عن القرية عشان تروح قلت لك عشان تنتبه ولا تروح لها ومو اي مكان يقولون روحه تروح طبعاً ولا فكرت في الي قاله وبما انه اعطاني مكان القرية بروحها وماهي اول مره عشان اخاف وقررت اروح للقرية بليل كملت يومي وعند الساعة 11 بليل انطلقت بسيارتي للقرية بديت ادخل باماكن مهجورة وباقي القليل عشان اوصل للقرية وانا امشي بسيارتي شفت شايب جالس على جانب الطريق وقفت سيارتي وسلمت عليه وسألته وش يسوي لحاله بهالمكان قال : استنى ولدي بيجيلي الح... ما امداه يكمل كلامه الا توقف سيارة فيها شاب وبنتين لابسين عبايات خرج الشاب وسلم علي ومسك يد الشايب وقال : يلا يا يبه خل نروح ودنا نرجع البيت انا وخواتي قام الشايب وركب السيارة هو وولده وانا رجعت لسيارتي ومسكت جوالي اناظر الساعة اوووف 12 مر الوقت بسرعة تنهدت وناظرت للمرآه الجانبية وش يسوون ذولا لسى ما مشوا !! ما ادري وش وضعهم واظن مالي شغل فيهم حاولت اشغل سيارتي مارضت !! حاولت وحاولت وحاولت ما رضت !! خرجت ورفست سيارتي وانا معصب وشو ذا ما تخرب الا الحين لفيت اناظر وكان الشاب يناظرني هو والشايب خرج الشاب من السيارة وبدأ يسألني وش السالفة قلت له ان السيارة خربت حط يده على كتفي وقال : انا سالم واعتبرني خويك وتعال اركب معنا بنوصلك لاي مكان تبي ما كان ودي وخاصة ان السيارة فيها بنات قلت : معليش بس مافي مكان بالسيارة اذهلني يوم قال : عادي اركب ورا مع خواتي صاحي ذا !! اكيد رفضت ورجعت اشوف وش سالفة سيارتي خرج الشايب وجاني ومسك يدي وقال : تعال يا ولدي اركب قدام جمب ولدي وانا بجلس ورا مع بناتي ما ارضى نخليك ونروح ما كان ودي بس استحيت من الرجال ورحت وركبت السيارة معه ما سألني سالم وين ناوي تروح بس كمل سيده بديت اسولف مع سالم وكان باين عليه طيب من طريقة كلامه لكن في شيء كنت احسه !! احس انه يدور بنفس الطريق !! الا والله يدور بنفس الطريق وهذه عاشر مره اشوف سيارتي !! ما سألته ليه يرجع لنفس الطريق لا مو خوف بس ابي اعرف لوين ناوي يوصل معقول ناويين يسوون فيني شيء ؟
ما زال سالم يدور بنفس الطريق لكن بلحظة جا بيغير وجهته بس ضربه الشايب على راسه وهو معصب ورجع سالم يدور بنفس الطريق طفشت ابي اعرف اخرتها لاحظ سالم اني فهمت انهم ناوين على شيء قال سالم : صالح كنت برد عليه بس سكت لحظة ذهول !! ليه ؟ لاني ما اتذكر اني قلت له اسمي !! وهنا قال الشايب : سالم خلك ساكت هنا تأكدت انهم ناوين على شيء وقمت ودفعت سالم ولصقته بالباب ودعست عالفرام ورجعت بطلع من السيارة بس مسكني الشايب بكل قوة صرخت : وش تبون فيني وهنا طلعوا البنات من السيارة بسرعة وسحبني الشايب على ورا وحط راسي على رجله بالقوة وهنا مشى سالم باسرع ما عنده كنت ابي انطق ابي اتحرك ماني قادر !! ناظرني الشايب وهو مبتسم وقال : كان حلمك تشوفنا ؟ واخيراً قدرت انطق وصرخت : من انتم عشان يكون حلمي اشوفكم ضحك الشايب وقال : يا كثر ما قريت قصصنا ومعلومات عنا والحين تقول من انتم ؟! شهقت وكنت ابي اتكلم بس ماقدرت !! وهنا قام الشايب وطلع من جيبه علبة فيها شيء زي المويا بس لونه احمر وكبه علي وهنا بديت اضحك بشكل هستيري ولا ارادياً وبديت اشوف كل شيء مشوش صرت اناظر بالشايب واناظر سالم وكان سالم يناظرني بطريقة غريبة عكس الشايب الي كان مبتسم وهنا فقدت الوعي !! فتحت عيوني وانا جمب سيارتي وقدامي سالم !! كنت احس بألم في كل جزء بجسمي ناظرني سالم وقال : صالح اسمعني وافهمني كمل سالم وهو يقول : هناك بعد هالطريق تلقى قرية والقرية منزلنا مثل ما انتم عندكم منازل وبسألك سوال هل تسمح احد يدخل بيتك ؟ اكيد جوابك لا وحنا بعد ما نسمح بس حنا غير الي يدخل بيوتنا ممكن نأذيه نتلبسه نقتله !! قلت وانا خايف : وانا وش صار لي ؟!! قال سالم : ما صار لك شيء انا اخذتك من عندهم وجبتك هنا قلت : ليه ؟! قال سالم : الجن منهم من تغلب قوته على ضميره والبعض يغلب ضميره على قوته وانا دائماً ادخل بيوت البشر ما يأذوني الا حين يقراون القرآن ! قلت : انت جني وساعدتني صح ؟! بس انت تأذيني الحين ؟ قال سالم : البشر ما يتحملون الجلوس مع الجن قلت : اسف ! وبديت اقرا آيات من سورة البقرة بتثاقل وبتعب وهنا قام سالم وركض واختفى انقذني جني من الجن ! ولكنه ساعدني وهو يأذيني ! ومن بعد الي صار اكتشفت ان العيش مع الجن مستحيل ! يا يأذوك بقربهم لك يا تأذيهم بالقرآن الكريم والذكر وتأكدت ان الجن احياناً قد يتعبوك عند قراءة القرآن فلا تسأل وتقول (ليه اتعب لا جيت اقرا القرآن) مو دائماً هم السبب ولكنهم هم من اهم اسباب تعبك عند قراءة قرآن • • *
| النهاية |
EmoticonEmoticon